تەگەری ٢٧.٥ یان ٢٩ بۆ دووچەرخەی شاخ؟

کاتێک دەچیتە فرۆشگایەکی دووچەرخە، یەکەم پرسیار کە ڕووبەڕووت دەبێتەوە ئەوەیە: "چ قەبارە تەگەرێکت دەوێت؟ ٢٦، ٢٧.٥ یان ٢٩ ئینج؟" پێشتر بژاردەکان کەم بوون، بەڵام ئەمڕۆ تەکنەلۆژیا جیهانی پاسکیلسواری گۆڕیوە. هەڵبژاردنی قەبارەی گونجاو کاریگەری ڕاستەوخۆی هەیە لەسەر خێرایی، کۆنتڕۆڵ و ئەو چێژەی لە وەرزشەکە وەریدەگریت.

"چ قەبارە تەگەرێکت دەوێت؟ ٢٦، ٢٧.٥ یان ٢٩ ئینج؟"

لێرەدا بە گشتگی باسی ئەو قەبارە جیاوازەکانی تەگەری دووچەرخەی شاخ دەکەین:

١. تایەی ٢٦ ئینج (کلاسیک و چالاک)

بۆ ماوەیەکی درێژ، ئەمە تەنها قەبارەی ستاندارد بوو بۆ هەموو دووچەرخە شاخییەکان. هەرچەندە ئەمڕۆ قەبارەی گەورەتر باو بووە، بەڵام ٢٦ ئینج هێشتا لایەنگری خۆی هەیە.

• سوودەکان: زۆر سووکە و وەڵامدانەوەی خێرایە (Responsiveness). بۆ ئەو شوێنانەی پێچی زۆریان تێدایە و پێویستیان بە مانۆڕی خێرا هەیە، ئەم قەبارەیە بێ وێنەیە.
  

• بۆ کێ گونجاوە؟ بۆ منداڵان، کەسانی کورتەباڵا، یان ئەوانەی چێژ لە پاسکیلسواری سەر شەقام و بازدان وەردەگرن.

٢. تایەی ٢٧.٥ ئینج (650b) (هاوسەنگی نێوان دوو جیهان)

ئەم قەبارەیە وەک "باشترین چارەسەر" سەیر دەکرێت، چونکە دەکەوێتە نێوان ٢٦ و ٢٩ ئینج. هەوڵدەدات خێرایی ٢٩ و چالاکی ٢٦ تێکەڵ بکات.

• سوودەکان: لە تایەی ٢٦ ئاسانتر بەسەر ئاستەنگەکاندا (بەرد و ڕەگی دار) دەڕوات، لە هەمان کاتدا لە تایەی ٢٩ سووکترە و کۆنتڕۆڵکردنی لە پێچەکاندا ئاسانترە.
  

• بۆ کێ گونجاوە؟ بۆ ئەو سوارچاکانەی دەیانەوێت پاسکیلەکەیان هەم خێرا بێت و هەم لە کاتی پێچەکاندا کۆنترۆل کردنی ئاسان بێت.

٣. تایەی ٢٧.٥+ ئینج (نەرمی و جێگیری زیاتر)

هێمای "پڵەس" (+) لێرەدا بەواتای تایەی زۆر پان دێت (زۆربەی کات ٢.٨ ئینج یان زیاتر لە پانی).

• سوودەکان: بەهۆی پانییەکەیەوە، هەڵخلیسکانی کەمترە و جێگیرییەکی سەرسوڕهێنەر بە سوارچاکەکە دەبەخشێت. ئەم تەگەرانە زۆر نەرمترن و هەڵەی سوارچاکەکە دەپۆشن (Forgiving ride)، چونکە ڕووبەرێکی زۆری زەوییەکە دەگرن. جار وایە بە کم کردنەوەی هەوای نێو تەگەری + دەتوانی هەندێک حاڵەتی فەنەری زیاتر بە دووچەرخەکە ببەخشی و لێخۆرینی نەرمتر دەبێت.
  

• بۆ کێ گونجاوە؟ بۆ سەرەتاییەکان کە دەیانەوێت هەست بە سەلامەتی و جێگیری بکەن، یان بۆ ڕێگای زۆر قوڕ و لیتە، بەفراوی و لمەڵانەکان.

٤. تایەی ٢٩ ئینج (29ers) (پاشای خێرایی و تێپەڕاندنی ئاستەنگ)

ئەم قەبارەیە شۆڕشێکی لە جیهانی پاسکیلسواریدا دروست کردووە، بە تایبەت لە پێشبڕکێکانی کڕاس-کەنتری (Cross-country).

• سوودەکان: هەرچەندە کێشیان کەمێک قورسترە و درەنگتر خێرا دەبن، بەڵام کاتێک کەوتنە جوڵە، هیچیان پێ ڕاناگات! بەهۆی گەورەیی قەبارەکەیانەوە، "گۆشەی هێرشکردنیان" (Attack Angle) بەرزترە، ئەمەش واتە زۆر بە ئاسانی بەسەر بەرد و چاڵەکاندا دەڕۆن بەبێ ئەوەی پاسکیلەکە بوەستێنن. هەروەها گرتنی (Grip) یەکجار زۆرە.
  

• بۆ کێ گونجاوە؟ بۆ ئەوانەی دەیانەوێت مەودای زۆر ببڕن، خێراییان بەرز بێت و کەمتر هەست بە زبریی ڕێگاکە بکەن.

کۆتایی: کامەیان هەڵدەبژێریت؟

هەڵبژاردنی قەبارەی تایە پەیوەندی بە ستایلی لێخوڕینت و ئەو شوێنەوە هەیە کە لێی دەخوڕیت. ئەگەر حەزت لە خێرایی و بڕینی مەودای درێژە، ٢٩ ئینج بۆ تۆیە. ئەگەر حەزت لە یاری و مانۆڕ و پێچی زۆرە، ٢٧.٥ ئینج هەڵبژێرە.

تایبەتمەندی	٢٧.٥ ئینج	٢٩ ئینج
خێرا بوون	خێراتر دەست پێ دەکات	درەنگتر بەڵام خێرایی دەپارێزێت
مانۆڕ و پێچ	زۆر چالاک و سووکە	جێگیر و ئارامە لە خێرایی زۆردا
تێپەڕاندنی بەرد	پێویستی بە هەوڵی زیاترە	وەک بلدۆزەر بەسەریدا دەڕوات
کێشی گشتی	سووکترە	قورسترە
باشترینە بۆ:	بازدان و ڕێڕەوی تەسک	مەودای درێژ و ڕێڕەوی زبر